Àwọn àgbà-ìyà tó pe’ra wọn ní “Yorùbá Council of Elders” ti tún fi ẹnu yàgbẹ́ o! L’akọ́kọ́ ná, ṣé ojú kì ń tì wọ́n ní? Ẹ jọ̀wọ́, ẹ bá wa béèrè lọ́wọ́ wọn pé, ṣé ọ̀run ni wọ́n ń gbé ni? nítorí ó dájú pé kì nṣe ayé yí ni wọ́n wà!
Àgbà-ìyà yín, ẹ pe’ra yín ní “àgbà” ní ilẹ̀ Yorùbá, ṣùgbọ́n ojú yín fọ́, ẹ ò mọ bó ṣe nlọ ní ilẹ̀ Yorùbá! Ẹ ya dìndìnrìn, ẹ ò mọ̀ pé kò sí Yorùbá nínú apanilẹ́kún jayé Nàìjíríà mọ́! Bóyá kẹ̀, ẹ mọ̀, ṣùgbọ́n ẹ ò fẹ́ gbà! Ìlú afẹ̀mì ṣòfò Nàìjíríà l’ó wù yín! Ìyẹn náà dára-à! Ṣùgbọ́n ẹ máṣe pe ara yín ní àgbà Yorùbá!
Orílẹ̀-Èdè Olómìnira Tiwantiwa ti Yorùbá (Democratic Republic of the Yoruba, D.R.Y) kò mọ nkan tó njẹ́ “Council of Elders”, D.R.Y ò dẹ̀ mọ ẹgbẹ́ kankan, torí ìjọba adelé wa, láti ọjọ́ kéjìlá, oṣù igbe, ọdún tí a wà nínú rẹ̀ yí, ẹgbàá ọdún ó lé mẹ́rinlélógún, lábẹ́ àkóso olórí-ijọba-adelé wa, Bàbá wa, Mobọ́lájí Ọláwálé Akinọlá Ọmọ́kọrẹ́, ti fagilé gbogbo ẹgbẹ́ ní ilẹ̀ Yorùbá o! Kí ẹ yára gbọ́! Ẹ̀sùn ìkọlu-orílẹ̀-èdè D.R.Y lẹ nfi ṣe’ré, tí ẹ ò bá dẹ́kun ẹgbẹ́kẹ́gbẹ́ tí ẹ nṣe!
Ìròyìn tó tẹ̀ wá lọ́wọ́ sọ pé àwọn àgbà-ìyà wọ̀nyí ní kí ìjọba agbésùnmọ̀mí nàìjíríà t’ó nfi’pá jẹgàba lórí ilẹ̀ D.R.Y ó mú ayé dẹrùn, pé ìyà ti pọ̀jù. Èyí túmọ̀ sí pé àwọn àgbà òfò wọ̀nyí ṣì nka ilẹ̀ Yorùbá mọ́ Nàìjíríà! l’aago mélo o? Ṣé ẹ̀yin àgbà-ìyà yí kò l’ojú’tì ni? Ẹ jáwọ́ l’apọ̀n tí ò yọ̀ ẹ gbómi ilá kaná kẹ̀. L’ati ọdún-m’ọdún tí ẹ ti nra’wọ́ ẹ̀bẹ̀ sí agbésùnmọ̀mí nàìjíríà kí ó ṣe rere, kòì tíì pàpà yé yín náà!? Ó mà ṣe o! Ẹ jọ̀ọ́, ẹ lọ wá’bi wọ́ sí!
Ìwọ Ọládipọ̀ Oyèwọlé, tí o pe’ra ẹ ní Akọ̀wé ẹgbẹ́-k’ẹgbẹ́ yí, o ti fi ara ẹ hàn o, ohun tí ò ńṣe yí, ṣé àyà ẹ́ gbe ṣá? Nítorí ó ún gb’ogun ti orílẹ̀-èdè aṣèjọba-ara-ẹni D.R.Y, o máa rí èsi ìgbógun-tì yí láìpẹ́, ṣùgbọ́n ire ni fún orílẹ̀-èdè D.R.Y,
ỌLỌ́RUN OLÓDÙMARÈ, ÀWÁMÁRIDÍ, NÍSIÌYÍ, BA GBOGBO OHUN-IBI JẸ́, PÁTÁPÁTÁ; GBOGBO MÁJẸ̀MÚ ÌRÁNṢẸ́-ẸNI-IBI, ÀṢÌTÁÁNÌ, GBOGBO ÌLÉRÍ, ÈTÒ, ÈTE, ÀTI ÈRÒ TÍ Ó LÒDÌ SÍ ORÍLẸ̀-ÈDÈ YORÙBÁ, ÌRAN YORÙBÁ, ILẸ̀ YORÙBÁ, ÌṢÈJỌBA YORÙBÁ, AGBÈGBÈ-ÀJOGÚNBÁ YORÙBÁ. NÍ AGBÁRA TÍ ỌLỌ́RUN FI NJẸ́ ÈMI-NI, KÍ ÌPARUN NÁÀ ṢẸLẸ̀ SÍ ÀWỌN Ọ̀TÁ YORÙBÁ WỌ̀NYÍ, LỌ́WỌ́LỌ́WỌ́ BÁYI
OLÓDÙMARÈ, ALÁGBÁRA, TÍ Ó NÍ IPÁ; OLÓDÙMARÈ TÍ Ó NÍ IPÁ LÓJÚ OGUN, ỌLỌ́RUN ÀWỌN ỌMỌ-OGUN, ṢE ÌPARUN PÁTÁPÁTÁ, NÍSIÌYÍ, FÚN ÀṢẸ, AGBÁRA ÀTI IPÒ TÍ WỌ́N NLÒ LÁTI JẸGÀBA LÓRÍ ORÍLẸ̀-ÈDÈ OLÓMÌNIRA TIWANTIWA TI YORÙBÁ, ÌRAN YORÙBÁ, ILẸ̀ YORÙBÁ, ÌṢÈJỌBA YORÙBÁ, AGBÈGBÈ-ÀJOGÚNBÁ YORÙBÁ.
ṢE ÌPARUN FÚN GBOGBO ÌWÀ ÌDÚKOKÒ, ÌJẸGÀBA, DÍDẸ́RÙBANI, ÌHÀLẸ̀, ÌGBÓGUN-TINI, TÍ WỌ́N DOJÚKỌ ỌMỌ-ÌBÍLẸ̀-YORÙBÁ, TI ORÍLẸ̀-ÈDÈ OLÓMÌNIRA TIWANTIWA TI YORÙBÁ
