GBOGBO ỌMỌ YORÙBÁ TÍ Ó JÁDE FÚN ÌFẸ̀HÓNÚHÀN ÌLÚ NÀÌJÍRÍÀ, Ẹ TI DÁ Ọ̀RÀN LÁBẸ́ ÒFIN ORÍLẸ̀-ÈDÈ YORÙBÁ !

Tinú ọ̀lẹ lọ̀lẹ ńjẹ; aṣiwèrè èèyàn ni ò mọ èrú tí yó gbà 

Ẹni a wí fún ọba jẹ́ ó gbọ́! Bẹ́ẹ̀ náà ni kò sí àwíjare kankan nílé ẹjọ́ látàrí “mi ò mọ̀ níì..”

Ìkéde tí ó jáde láti ọ̀dọ̀ àwọn aṣojú Ojúlówó Ọmọ Ìbílẹ̀ Yorùbá, ní àná, ọjọ́ kíní, oṣù ògún, ẹgbàá ọdún ó lé mẹ́rin-lé-lógún, ti fi lé’de o, pé, gbogbo ẹni tí wọ́n pe ara wọn ní ọmọ Yorùbá, ṣùgbọ́n tí wọ́n jádé fún ìwọ́de àti ìfẹ̀hónúhàn tí ọ̀dọ́ àwọn ìlú tí ó fẹ̀gbẹ́ tì wá, nàìjíría nṣe, tí wọ́n sì kópa nínú rẹ̀, tí wọ́n ṣe èyí ní orí ilẹ̀ Yorùbá, Democratic Republic of the Yoruba, gbogbo yín PÁTÁ, ni ẹ ti dá’ràn o, lábẹ́ òfin Orílẹ̀-Èdè Yorùbá.

Ìdí ni pé, gẹ́gẹ́bí ọmọ Yorùbá, ẹ́ẹ̀ kì nṣe ọmọ-ìlú Nàìjíríà!

Yorùbá ti kúrò lára Nàìjíríà láti ogúnjọ́ oṣù Bélú, ẹgbàá ọdún ó lé méjì-lé-lógún, bẹ́ẹ̀ ni a dẹ̀ ti gbé ìjọba ti’wa wọlé sórí alééfà ilẹ̀ Yorùbá láti ọjọ́ kéjìlá, oṣù igbe, ẹgbàá ọdún ó lé mẹ́rin-lé-lógún.

Nítorí èyí, ẹ mọ̀ dájú pé, gbogbo ẹ̀yin tí ẹ jáde láti ṣe ìfẹ̀hónúhàn pẹ̀lú àwọn ọmọ nàìjíríà, tí ẹ dẹ̀ ṣe bẹ́ẹ̀ ní orí ilẹ̀ Yorùbá, ẹ ti fún’ra yín júwe ara yín, pé, ọmọ Nàìjíríà ni’yín, ẹ kìí ṣe ọmọ Orílẹ̀-Èdè Olómìnira Tiwantiwa ti Yorùbá.

Bí eléyi bá sì rí bẹ́ẹ̀, ọ̀ràn dídá gbáà ni ó tún jẹ́ fún yín, pé, ẹ gbé ìfẹ̀hónúhàn Nàìjíríà wá sí orí ilẹ̀ Yorùbá! Lápá kan ná, Nàìjíríà kọ̀, títí di àsìkò yí, láti dá wa mọ̀ gẹ́gẹ́bí orílẹ̀-èdè aṣèjọba-ara-ẹni; àwa kò sì mọ nàìjíríà gẹ́gẹ́bí orílẹ̀-èdè, gbogbo ohun tí ó jẹ́ ti nàìjíríà ní orí ilẹ̀ Yorùbá, jẹ́ ọ̀ràn-dídá gidi, lábẹ́ òfin Orílẹ̀-Èdè Yorùbá.

Ẹnikẹ́ni tí ó bá ṣì ní etí láti gbọ́, kí ó gbọ́ọ báyi, lẹ́ẹ̀kan síi – Nàìjíríà àti Orílẹ̀-Èdè Olómìnira Tiwantiwa ti Yorùbá (D.R.Y) kò papọ̀ rárárárá!

Ẹ̀yin tí ẹ ò mọ̀, kò sí ire kankan mọ́, láyé, tí ó lè ti inú Nàìjíríà jáde wá fún yin; ẹ má tilẹ̀ fi ìgbésí ayé yín ṣòfò kí ẹ máa rò pé nkankan ṣì máa mú adùn wá fún yín láti inú Nàìjíríà!

Ọjọ́ kèjìlá, oṣù igbe, ọdún tí a wà nínú rẹ̀ yí, ni Ìjọba Orílẹ̀-Èdè Yorùbá, D.R.Y, ti wọlé sorí àlééfà, bí ó tilẹ̀ jẹ́ pé àwọn ológun àti ọlọ́pa àti olóṣèlú nàìjíríà ṣì nfi ipá dúró lórí ilẹ̀ wa, ṣùgbọ́n wọ́n máa kúrò láìpẹ́! Ilẹ̀ Yorùbá ni ire yín wà, gbogbo ẹ̀yin Ọmọ Ìbílẹ̀ Yorùbá.

Ẹ ní ìgbàgbọ́, kí ẹ sì ní Ìgbẹ́kẹ̀lé, pé, Orísun yín – tí nṣe Ilẹ̀ Yorùbá – níbẹ̀ ni ogo yín wà! A ti pàdà sínú ògo wa; a ti padà sínú ọlánlá tí a ti wà rí, kí òyìnbó amúnisìn ó tó dé; kí wọ́n tó fi tipá so wá papọ̀ pẹ̀lú àwọn ìràn míràn tí ìṣẹ̀dá wọn lòdì sí tiwa!

Gbogbo ọmọ ìbílẹ̀ Yorùbà, ẹ gbárùkù ti Orílẹ̀-Èdè Yorùbá, ibẹ̀ ni ayọ̀ yín wà, kò sí ohun tí Nàìjíríà ní fún yín, àfi ìrònú, ìpọ́njú àti àìní lọ.

Ẹ jẹ́ kí ọkàn yín kí ó kúrò lára ìlú tí wọ́n npè ní Nàìjíríà yẹn.

Ní kété tí a bá ti lé àwọn t’ó njẹgàba wọ̀nyí kúrò lórí ilẹ̀ wa, ìjọba Orílẹ̀-Èdè Yorùbá máa wọlé sínú gbogbo oríkò-ilé-iṣẹ́-ìjọba wa, láti Ìbàdàn dé Èkó, títí dé Òṣogbo, dé Abẹ́òkúta, títí dé Adó-Èkìtì, dé Àkúrẹ́, lọ dé Ìlọrin, dé Lọ́kọ́ja, tí iṣẹ́ á wá bẹ̀rẹ̀ lójú páálí gan-an.

Ètò fún ọ̀pọ̀ yanturu onjẹ, káàkiri ilẹ̀ Yorùbá, ti wà ní’lẹ̀; bẹ́ẹ̀ náà ni ètò-ààbò tó péye ni ìjọba Orílẹ̀-Èdè Yorùbá ti ṣe àlàkalẹ̀ rẹ̀ sí’lẹ̀. Kò sí pé wọ́n nji’ni gbé mọ́, tàbí wọ́n nfi’pá bá’ni lòpọ̀.

Gbogbo ọ̀dọ́ Yorùbá, àti ọmọ Yorùbá, lápapọ̀, ni ó máa rí iṣẹ́ tí ó tó iṣẹ́ ṣe, tí a dẹ̀ máa máa gba owó tí ó tó owó ní orílẹ̀-èdè wa. Kò sí ohun tí ó njẹ́ “owó-oṣù” nì orílẹ̀-èdè Yorùbá; owó iṣẹ́ ọ̀sẹ̀-méjì-méjì ni Orílẹ̀-Èdè Yorùbá ti ṣe’tò rẹ̀ fún wa, ní kété tí a bá ti lé àwọn agbésùnmọ̀mí Nàìjíríà wọ̀nyí kúrò lórí ilẹ̀ Yorùbá, tí owó náà kò dẹ̀ ní jẹ́ owó kékeré rárá!

Gbogbo àwọn ọmọ-ilé-ìwé ní Orílẹ̀-Èdè Yorùbá wa, ní ó máa ni ẹ̀kọ́ tó yè kooro, tó sì jẹ́ Ọ̀FẸ́ gbáà ni láti ilé-ìwé alákọbẹ̀rẹ̀, títí ó fí dé ipele àkọ́gboyè kíní ní ilé-ẹ̀kọ́ fásitì.

Àwọn arúgbó wa gbogbo ní Orílẹ̀-Èdè Yorùbá máa máa ṣe ìtọ́jú fún wọn lóòrè kóòrè, tí ebi kankan kò le pa wọ́n mọ́, títí ayé! Bẹ́ẹ̀ ni gbogbo aláboyún tí ó bá ti jẹ́ ọmọ-ìbílẹ̀ Yorùbá máa ní ìtọ́jú tó péye.

Gbogbo àwọn ọmọ wa, láti inú oyún ni wọ́n ti máa máa gba ìtọ́jú; kò sí ìyà tàbí òṣì mọ́ ní kété tí a bá ti lé àwọn agbésùnmọ̀mí nàìjíríà wọ̀nyí kúrò lórí ilẹ̀ wa tán.

Ẹ lè máa béèrè wípé, báwo ni? Ẹ fi’yẹn sílẹ̀ fún àwọn aṣáájú wa, Màmá wá, Ìyá-Ààfin Modúpẹ́ Onítirí-Abíọ́lá, ẹni tí Olódùmarè fi iṣẹ́ ìdándè Ọmọ àti Ìran Yorùbá yí rán; wọ́n ti nṣiṣẹ́ lọ gẹ́gẹ́bí Olódùmarè ti fi rán wọn; láìpẹ́ láìjìnà a máa gbọ́ ìròhìn ayọ̀.

Ẹ jẹ́ kí ìgbẹ́kẹ̀lé yín nínú Olódùmarè àti iṣẹ́ tí Ó gbé lé Màmá wa lọ́wọ́, kí ó dúró ṣinṣin.

Orílẹ̀-Èdè Olómìnira Tiwantiwa ti Yorùbá kìí ṣe ibi tí ẹ̀rù ti máa máa bà yín láti rin ìrìn-àjò kankan, rárá o! Ìbáà ṣe aago méjì oru ni ẹ gbé’ra ní Èkó, tí ẹ nwa ọkọ̀ lọ sí Lọ́kọ́ja, ẹ̀mí yín dè, látàrí ètò ààbò tó péye.

Kò ní sí ikú àìtọ́jọ́ mọ́ kankan ní ilẹ̀ Yorùbá, látàrí onjẹ tó péye tí ọmọ Yorùbá máa máa jẹ; bẹ́ẹ̀ ni ètò ìwòsàn tí ó máa ṣe gbogbo ayé ní hààà, òun ni Orílẹ̀-Èdè Yorùbá ti ní Àlàkalẹ̀ rẹ̀ fún gbogbo Ọmọ Ìbílẹ̀ Yorùbá! Ọ̀FẸ́ pátápátá dẹ̀ ni fún wa.

Gbogbo ọmọ Yorùbá, ẹ jẹ́ kí á máa jó, kí á sì máa yọ – ire wa ti búyọ! Olódùmarè ti sọ Ọ̀rọ̀ wa D’ayọ̀! Lábẹ́ ìtọ́sọ́nà àti ìdarí tí Ọlọ́run Ẹlẹ́da wa nfún màmá wa, tí àwa náà sì ntẹ̀lé wọn, ìgbàlà wa ti dé, títí ìran-d’iran gbogbo ọmọ Yorùbá dẹ̀ ni!

Ẹ̀yin àgbẹ̀, ẹ bẹ̀rẹ̀ sí ní yọ̀! Kò sí ẹnikẹ́ni tí ó máa lé yín kúrò lórí oko yín mọ́! Ìrọ̀rùn ti dé. Kò sí irúfẹ́ òwò, ní rere, tí ọmọ Yorùbá kankan fẹ́ ṣe, tí kò ní sí àtìlẹhìn ìjọba fún ọmọ Yorùbá bẹ́ẹ̀ – ìyẹn Ojúlówó Ọmọ Ìbílẹ̀ Yorùbá!

Láyé! ìyà kò ní jẹ wá mọ́ lórí ilẹ̀ Baba wa! Adúpẹ́ lọ́wọ́ Ọlọ́run Olódùmarè, Ẹlẹ́da gbogbo ọmọ Yorùbá; bẹ́ẹ̀ ni a dúpẹ́ lọ́wọ́ Ìyá Wa, Olùgbàlà tí Olódùmarè rán sí Ìran Yorùbá, Ìyá-Ààfin Modúpẹ́ Onítirí-Abíọ́lá, fún jíjẹ́ tí wọ́n njẹ́ iṣẹ́ náà.

Ọmọ Yorùbá, gbàgbé Nàìjíríà, ó ti di ohun tí ó ti kúrò nínú ìgbésí ayé wa, àti kúrò nínú ìrírí wa.

Ní Orílẹ̀-Èdè Yorùbá yí, kò sí ẹnikẹ́ni tó máa ṣe ẹrú-ikú fún ẹnikẹ́ni, bẹ́ẹ̀ ni kò sí òṣèlú tí ó máa rí àyè mú ẹnikẹ́ni l’ẹrú!

Ìjọba kankan kò lè d’ẹrù ba Ọmọ Yorùbá; bẹ́ẹ̀ ni ọlọ́pa tàbí ológun kankan kò lè fi àbùkù bá ọmọ Yorùbá tàbí kí ó fi ìyà jẹ ọmọ Yorùbá.

Òyìnbó-amúnisìn kankan, láí, kò lágbára lórí ìlẹ̀ tàbí ọmọ Yorùbá mọ́! A ti ré èpè náa sọnù, ọmọ Yorùbá kò sí lábẹ́ ẹnikẹ́ni mọ́, láyé.

Ọmọ Yorùbá, ètò ti wà ní’lẹ̀ o, láti ríi pé kò sí ẹnikẹ́ni nínú wa tí kò níí ní ilé tí ó buyì kún ni, tí yíò lè tọ́ka sí pé ‘ilé mi nìyẹn,’ tàbí ‘ilé wa, ilé ìdílé mi, nìyẹn.’

Gbogbo àsà wa tí a ti sọnù, òun ni ètò àti mú wọn wá sí ìmúṣe ti wà fún.

Àgbáyé a máa jowú wa ní ti rere ni! Ẹ jọ̀wọ́, ọmọ Yorùbá, ẹ gbé ojú yín kúrò ní nkan tí wọ́n npè ní Nàìjíríà; ẹ jẹ́ kí á kọ’jú sí ibi tí a nlọ: oríkò-ilé-iṣẹ́-ìjọba wa, káàkiri, orílẹ̀-èdè Yorùbá, kí ìjọba wa kí ó wọ’bẹ̀, láti bẹ̀rẹ̀ iṣẹ́ ní tààrà, ìyẹn ni kí á fọkàn sí o.

Kò sí ọ̀wọ́n ohun kankan tí a nílò ní ilẹ̀ Yorùbá o. Nítorí èyí, ẹ jẹ́ kí ọkàn wa kí ó balẹ̀; ohun tí ó nti èbúté omi òkun àti ọ̀sà tí Olódùmarè fi jí-ìn-kí ilẹ̀ Yorùbá, nìkan, tilẹ̀ ti tó waá jẹ; ilẹ̀ Ọlọ́ra tí a tún wá ní nkọ́? góòlù tí ó wà nínú ilẹ̀ wa nkọ́?

Oríṣiríṣi àlùmọ́ọ́nì-ilẹ̀, òkúta olówó-iyebíye; èyí tí a fi nkọlé, èyí tí a fi nṣe títì ọlọ́dà; méló ni a fẹ́ máà kà ní ọ̀gọ̀ọ̀rọ̀ eyín adépèlé ohun rere gbogbo tí Olódùmarè fi dọ́ṣọ̀ ilẹ̀ wa, fún ire wa, láti ìran-d’iran!

Orílẹ̀-Èdè Yorùbá ti dé o! Gbogbo ọmọ Yorùbá, ẹ gbàgbé àkísà nàìjíríà o! Ẹ ju nàìjíríà àti òórùn rẹ̀ sọnù pátápátá! Ẹ máṣé tún bá wọn kópa nínú ìwọ́de tàbí ìfẹ̀hónúhàn òṣì wọn! Ẹ jọ̀wọ́, ẹ má ti ẹ̀ jẹ́ kí á fẹnu bàá mọ́!

Olódùmarè ni ó bùkún Orílẹ̀-Èdè Olómìnira Tiwantiwa ti Yorùbá.